Play RTR

Emissiuns
Live
Program TV

Tschertga

Cuntrasts

Films documentars cun in spectrum vast e varià. L'emissiun documentescha la cultura rumantscha e grischuna. Ella reflectescha e preschenta midadadas, svilups ed istorgias da noss mintgadi, da la societad, la politica, la cultura, il sport ed auter. // Cuntrasts zeigt rätoromanische Dokumentarfilme.

EMF26 Marsch! Al puls da paucas e paradas

EMF26 Marsch! Al puls da paucas e paradas

25'000 musicantas e musicants a la Festa federala da musica 2026 a Bienna - la musica da marsch entusiasmescha la Svizra. La Festa federala da musica 2026 a Bienna ha scrit istorgia: passa 25'000 musicantas e musicants han fatg resunar la citad. Surtut la musica da parada ha attratg in public immens - tant live sin plazza sco er online: dapli che 500'000 visitas han guardà ils livestreams e videos sin www.rtr.ch/emf26. Ma tge fa ora la fascinaziun da la musica da marsch? Il reporter Claudio Spescha, che deriva sez d'ina famiglia cun ina gronda tradiziun da musica da marsch, va suenter a questa dumonda. Pli baud sez part da la scena, stat el oz sco saxofonist sin tribuna cun la band da Cuira Friday Music Factory e sa metta sin ina tschertga persunala. El accumpogna la Societad da musica Trun cun sia musica da marsch tradiziunala e la Musikgesellschaft Union Chur, enconuschenta per sias evoluziuns spectacularas. Ensemen cun ses bab Arnold Spescha s'approfundescha el er en l'ierta d’ Oscar Tschuor, in dals cumponists da musica da marsch ils pli impurtants da la Svizra. In film documentar captivant davart passiun, tradiziun e la magia da la musica da marsch.

27 min

Il Sontg Spiert sa era rumantsch – da la valur da la lingua en baselgia

Il Sontg Spiert sa era rumantsch – da la valur da la lingua en baselgia

Saji Vellavoor è da l’India, Adam Pradela da la Pologna e Marianne Strub da la Bassa. Trais persunalitads cun trais biografias fitg differentas. Tuttina èn ellas unidas en in spiert – sco persunas spiritualas s’engaschan ellas per il bainstar spiritual da Rumantschas e Rumantschs. Sur Saji en Surselva, ser Adam en il Surses e reverenda Marianne en l’Engiadina Bassa. La visita dals «Cuntrasts» per la dumengia da Tschuncaisma mussa la vita da las trais persunalitads en lur raspadas e vegn uschia er in zic sin ils fastizs dal Sontg Spiert e da sia abilitad dad unir, nua che las linguas èn differentas.

27 min

Il rapiment – Not Vital ed il pretsch da l’art

Il rapiment – Not Vital ed il pretsch da l’art

Not Vital è in dals pli enconuschents artists da la Svizra. El ha vivì e lavurà sin l’entir mund. Blers onns er en l’Africa: en il Niger, in dals pli paupers pajais dal mund. Quest temp è stà decisiv per sia carriera. Ma en la sumbriva dal success sa zuppa er ina vart tragica: Il matg 2012 è in stretg parent da Not Vital vegnì rapinà ad Agadez. 14 onns pli tard raquinta l’architect ed artist Nicolò Krättli per l’emprima giada publicamain envers RTR tge ch’è capità lezza giada. Sia istorgia è era l’istorgia da Not Vital – ed ella mussa l’ovra e l’operar da l’artist da success en ina nova glisch.

26 min

Il rapiment

Il rapiment

Il 2012 era Nicolò Krättli, il giuven student d'architectura e parent da Not Vital, ad Agadez per realisar ina proxima ovra per il «Jardin» da Not Vital. Ma durant quest segiurn è capità in eveniment cun grevas consequenzas. Nicolò Krättli è vegnì rapinà ensemen cun il Tuareg Akhmed Haïdara. En la restrospectiva di l'architect da Cuira: «Jau saveva ch’i dat in privel da vegnir rapinà. Ed en quel mument savev'jau: ussa èsi capità». Ils rapinaders han transportà els en il desert. Ils bandits han pretendì blers daners. Els vulevan che l’artist da renum mundial paja in milliun euros. Not Vital ha pajà ina part. Ses parent è vegnì liber. Per blers onns era quest rapiment in grond secret. Ussa raquintan tant Not Vital sco era Nicolò Krättli per l’emprima giada publicamain da quest mument clav en lur vita. --- 2012 war Nicolò Krättli, ein junger Architekturstudent und Verwandter von Not Vital, in Agadez, um ein nächstes Werk für den «Jardin» von Not Vital zu realisieren. Doch während dieses Aufenthalts geschah ein folgenschweres Ereignis. Nicolò Krättli wurde zusammen mit dem Tuareg Akhmed Haïdara entführt. Im Rückblick sagt Krättli gegenüber RTR: «Ich wusste, dass die Gefahr besteht, entführt zu werden. Und in diesem Moment wusste ich: Jetzt ist es passiert.» Die Räuber verschleppten sie in die Wüste. Die Banditen forderten viel Geld. Sie wollten, dass der weltberühmte Künstler eine Million Euro zahlte. Not Vital zahlte einen Teil. Sein Verwandter kam frei. Für viele Jahre war diese Entführung ein grosses Geheimnis. Nun erzählen sowohl Not Vital als auch Nicolò Krättli erstmals öffentlich gegenüber RTR von diesem Schlüsselmoment in ihrem Leben.

6 min

La famiglia Haïdara – las consequenzas

La famiglia Haïdara – las consequenzas

Il 2012 era Nicolò Krättli, il giuven student d'architectura e parent da Not Vital, ad Agadez per realisar ina proxima ovra per il «Jardin» da Not Vital. Ma durant quest segiurn è capità in eveniment cun grevas consequenzas. Nicolò Krättli è vegnì rapinà ensemen cun il Tuareg Akhmed Haïdara. Ils rapinaders han transportà els en il desert. Ils bandits han pretendì blers daners. Els vulevan che l’artist da renum mundial paja in milliun euros. Not Vital ha pajà ina part. Ses parent è vegnì liber. Entant che Nicolò Krättli ha pudì turnar en Svizra, ha para cumenzà per la famiglia da Tuaregs Haïdara in lung martiri. Akhmed Haïdara, ch’era vegnì rapinà da quel temp ensemen cun Nicolo Krättli, è tenor atgnas indicaziuns vegnì liber be grazia ad in parent cun gronda influenza. Tge che sia famiglia ha fatg tras descriva el uschia: «Suenter è mia famiglia vegnida mulestada onns a la lunga dals rapinaders. Dus da mes frars èn vegnids rapinads ed èn stads blers onns ostagis. Nus avain stuì pajar ils ulteriurs 650'000 euros. Ussa avain nus gronds debits. Cun Not Vital n'avain nus nagin contact pli. Tut è ì en paglia.» --- 2012 war Nicolò Krättli, ein junger Architekturstudent und Verwandter von Not Vital, in Agadez, um ein nächstes Werk für den «Jardin» von Not Vital zu realisieren. Doch während dieses Aufenthalts geschah ein folgenschweres Ereignis. Nicolò Krättli wurde zusammen mit dem Tuareg Akhmed Haïdara entführt. Die Entführer brachten sie in die Wüste. Die Banditen forderten viel Geld. Sie wollten, dass der weltberühmte Künstler eine Million Euro zahlte. Not Vital zahlte einen Teil. Sein Verwandter kam frei. Während Nicolò Krättli in die Schweiz zurückkehren konnte, begann für die Familie Haïdara offenbar ein langes Martyrium. Akhmed Haïdara, der damals zusammen mit Nicolo Krättli entführt worden war, kam nach eigenen Angaben nur dank eines einflussreichen Verwandten frei. Was seine Familie durchgemacht hat, beschreibt er so: «Danach wurde meine Familie jahrelang von den Entführern belästigt. Zwei meiner Brüder wurden entführt und waren viele Jahre Geiseln. Wir mussten die restlichen 650 000 Euro bezahlen. Jetzt haben wir hohe Schulden. Mit Not Vital haben wir keinen Kontakt mehr.»

42 s

«Franar la decadenza» – In sguard filmic sin la conservaziun dal plafond da maletgs a Ziràn

«Franar la decadenza» – In sguard filmic sin la conservaziun dal plafond da maletgs a Ziràn

Il palantschieu da maletgs da la baselgia da Ziràn è passa 900 onns vegl e vala sco la pli impurtanta ovra da quest gener en l'entira Europa. Ma i dovra blera lavur per preservar las 153 tavlas per las generaziuns vegnintas. In entir team da spezialists lavura vi dals maletgs fragilas. Il cineast Casper Nicca ha pudì guardar sur spatla als restauraturs e discurrer cun l'istoricher d'art Marc Antoni Nay davart il conservar ina tala ovra ma er davart la muntada dal palantschieu da maletgs. Marc Antoni Nay di «Nus na pudain betg franar dal tut la decadenza, senza destruir ils maletgs.» Uschia mussa il film co el vegn empruvà da gudagnar la cursa cunter il temp, savend che quai n’è betg pussaivel. Il viadi visual vegn accumpagnà da l'artist da sound Silvan Nicca che ha creà in spazi da tun che dat vita als maletgs e fa ch'ins senta quant vivs ch'els èn anc oz.

26 min

Ceder n’è nagina opziun

Ceder n’è nagina opziun

Ina gievgia da zercladur avant trais onns ha la vita dad Edi Truog prendì ina vieuta dramatica. Curt suenter la partenza cun ses parasgol è il bab da famiglia, da quella giada 50 onns, crudà radund 30 meters en la profunditad. L'ultima secunda èsi bain reussì al parasgulader versà da puspè avrir il parasol, ma il sfratg giu sin terra è succedì cun tutta forza. Dapi quest grev accident è Edi Truog dependent da la sutga cun rodas. Il film documentar dals «Cuntrasts» accumpogna il sportist passiunà tras la reabilitaziun e sin sia via enavos a chasa tar sia famiglia – in viadi emoziunal tranter speranza e sconfittas, marcà da pitschens sco era gronds progress. Il titel è program: ceder na vegn betg en dumonda per Edi Truog. Malgrà la perdita da sia libertad sportiva, cumbatta el per turnar en la vita – e chatta en quest process schizunt puspè enavos tar ina veglia passiun.

27 min

Art en dus: Ursina Giger e Florian Egli – musica, famiglia e carriera

Art en dus: Ursina Giger e Florian Egli – musica, famiglia e carriera

Co vegn ins da metter duas carrieras musicalas ed il mintgadi cun dus uffants pitschens sut in tetg? Il film documentar da Casper Nicca «Art en dus: Ursina Giger e Florian Egli – musica, famiglia e carriera» mussa la vita dad Ursina Giger e Florian Egli che collavuran musicalmain e ch’èn era privat in pèr, ina famiglia. Tuttina sche Ursina intganta il public cun ses artpop melancolic rumantsch en l’acustica monumentala da l’Ark Nova a Lucerna u sche Florian festivescha il mument cun ses trio da jazz – la musica è adina en il center. Lur mintgadi ha savens lieu tranter lur agen pitschen studio e lur abitaziun a Turitg, tut en la medema chasa. Qua vegn vivì e lavurà: sessions da registraziun fruntan sin il caos da famiglia. E Florian manegia cun in rir: «Uffants èn tant stress ch’in concert è sco vacanzas.» Ed Ursina respunda: «Els na laschan betg bler spazi, ma sch’i va propi per insatge, alura èn els fitg pulits!» Il realisatur da films Casper Nicca ha chattà in purtret intim. In sguard onest sin dus musicists excepziunals che mussan che la pli gronda sfida n’è betg la tribuna, mabain da chattar l’armonia tranter mintgadi e carriera.

26 min

Las olmas selvadias

Las olmas selvadias

Centers per la tgira d’animals domestics datti blers. Tals per salvar e tgirar animals selvadis ch’èn vegnids blessads datti però strusch. «Erminea» è in center da tgira d’animals selvadis a Chavornay (VD). Il team da spezialistas e spezialists, da tgirunzas e veterinaris s’engascha cun passiun per ils animals selvadis. Igl è in dals paucs lieus en Svizra, nua che selvaschina blessada vegn tractada e tgirada avant ch’ins la metta puspè en libertad.

26 min

Memorias femininas

Memorias femininas

Il film documentar rumantsch preschenta l’Archiv da cultura da dunnas dal Grischun. El è vegnì fundà l’onn 1997 da l’istoricra Silke Margherita Redolfi e da la schurnalista Silvia Hofmann-Konrad, e quai per necessitad. Relaschs e documents da dunnas e d’organisaziuns da dunnas èn numnadamain savens vegnids bittads davent. Els valevan sco betg degns da vegnir archivads. Uschia èn idas en emblidanza impurtantas biografias da dunnas. Oz è l’Archiv da cultura da dunnas etablì e posiziunà a moda multifara. En las localitads d’archiv climatisadas èn deponids documents, brevs, fotografias ed objects. I dat in’interessanta biblioteca cun cudeschs da e davart dunnas. Ultra da quai organisescha l’Archiv da cultura da dunnas occurrenzas e prelecziuns. La camera accumpogna la manadra Silke Margherita Redolfi durant sia lavur ed a preschentaziuns publicas ed è da la partida, cura ch’ella po retrair relaschs. Il film mussa bels inscunters, ma era problems, cun ils quals l’Archiv da cultura da dunnas cumbatta.

26 min

Per Pasca – chant giuvenil sco segn da speranza e cuminanza

Per Pasca – chant giuvenil sco segn da speranza e cuminanza

Pasca è la festa da la levada, da nova vita, d’ina nova entschatta. Da Pasca festivesch’ins la primavaira: l’energia dal resvegl, dal cor lev plain smirvegl per prads e pumera en flur e colur. Pasca annunzia dis pli chauds, legria ed engraziaivladad. Tge giess qua meglier a prà ch’il chant da giuvnas e giuvens ch’èn sezs en plaina flur, plain energia e speranza? Perquai emetta RTR per Pasca in concert dal Chor da giuvenils grischun a chaschun da la Schubertiada 2025 a Sion. «Jeunes Talents» è in’iniziativa da la SRG SSR per promover giuvens talents musicals. En il rom da differents projects vegnan ils cunfins linguistics surmuntads e musicistas e chantadurs da l’entira Svizra s’entaupan per lur gronda passiun: la musica. Uschia è vegnida realisada durant il festival Schubertiada 2025 a Sion ina retscha da concerts cun ils quatter chors da giuvenils Coro Calicantus, Singknaben der St. Ursenkathedrale Solothurn, Schola de Sion ed il Chor da giuvenils grischun. RTR è stà da la partida ed ha registrà ils concerts en la famusa ed imposanta «Basilique de Valère Sion».

25 min

Snowli, tetris e pommes – in di en la scola da skis

Snowli, tetris e pommes – in di en la scola da skis

Ella n’è betg la pli gronda scola sa skis, dentant la pli lunga – la Scola da skis svizra Corvatsch-Puntraschigna. Staziunada en quatter lieus da l’Engiadin’Ota tanscha ella dal Pass dal Malögia fin sin il Pass dal Bernina. Ils dis da la stagiun auta èn var 600 uffants annunziads per emprender dad ir cun skis – 105 scolastas e scolasts engaschads. In team da quatter reporters èn stads sin pista ed han guardà davos las culissas da la scola da skis.

26 min

Julia: Ina vita cun l’uffant ch’emblida – demenza cun indesch onns

Julia: Ina vita cun l’uffant ch’emblida – demenza cun indesch onns

Tge capita, sch’in uffant emblida ses mund mintga di in zic dapli. Julia, che ha oz indesch onns, patescha dal sindrom da Sanfilippo, ina malsogna rara dal metabolissem ch’è era enconuschenta sco demenza d’uffants. Il film documentar dals «Cuntrasts» accumpogna ils geniturs Ursina e Mario sco era Julia e la sora pitschna Giada en lur mintgadi extraordinari. La malsogna Sanfilippo è crudaivla: Julia perda cuntinuadamain abilitads ch’ella ha emprendì cun fadia – discurrer, chaminar, mangiar. Mintga di è in cumbat encunter l’emblidar. Ma l’istorgia da la famiglia è dapli ch’in culp dal destin. Igl è in’istorgia da resolutezza. Ursina e Mario na cumbattan betg mo per la qualitad da viver da lur figlia, mabain era per tut ils auters uffants pertutgads en l’entir mund. Lur finamira: scleriment, renconuschientscha e guariziun. Il film mussa ils dirs muments, ma celebrescha a medem temp l’amur e las pitschnas miraclas dal mintgadi.

26 min

LA LAVINA ALVA – Cuira, crack ed il local da consum

LA LAVINA ALVA – Cuira, crack ed il local da consum

«Igl è brutal a Cuira – crack-city, effectiv». Sche pertutgadas e pertutgads discurran uschia da lur citad, na sa lascha il problem betg pli ignorar. Il film mussa co che l’atmosfera en il Stadtgarten a Cuira, ina da las grondas scenas da drogas avertas en Svizra, è sa midada ils ultims onns. Dapli persunas, dapli agressivitad, dapli delicts. Tut quai è la consequenza dal crack che ha remplazzà per gronda part il heroin ed autras substanzas. Ma ussa datti nova speranza a Cuira. Mez mars vegn avert il nov local da consumar. Las spetgas èn grondas. In sguard en il local a Turitg mussa ch’il concept po funcziunar. A Cuira èn las consumentas ed ils consuments dentant anc fitg sceptics.

26 min

Gieus olimpics a Livigno – genial u fatal?

Gieus olimpics a Livigno – genial u fatal?

Sigls spectaculars giu d’ina schanza da 55 meters cun rotaziuns ch’ins vegn be sturn da guardar – quai è stà il final dal Big Air als gieus olimpics a Livigno, paucs kilometers davent da la Svizra. E là ha il reporter Claudio Spescha vulì esser da la partida en il public. Ma co fan ins quai ina sonda il favrer, cura che blers van en vacanzas da skis – e ch’igl ha gia bler traffic senza gieus olimpics? Claudio Spescha è ì tuttina. Tanschi per esser ad uras a Livigno e sfunsar en l’atmosfera olimpica – u datti in caos da traffic sin las vias grischunas? Tenor il concept dal chantun Grischun èsi da quintar cun fin 4000 visitadras e visitaders supplementars en confrunt cun il traffic normal da la stagiun auta. Il chantun Grischun ha mess en pe in concept da traffic per 5,5 milliuns francs per pudair transportar las persunas che vulan ir a Livigno – Livigno ch’è accessibel l’enviern be tras il tunnel da Munt la Schera cun unicamain in vial. Ins ha installà: quatter areals da park & ride cun tut il persunal necessari, curs supplementars da la Viafier retica tras il tunnel dal Vereina, ina colliaziun spessa d’autos da posta tranter Zernez/Müstair e Livigno che basegna 30 manischunzs d’autos da posta supplementars. Tge portan quels gieus olimpics al Grischun, auter che traffic e custs per manischar quel – senza avair la garanzia che l’Italia sa participeschia lura propi a quels custs? Ed insumma: n’èn gieus olimpics fin ussa betg stads per regla ina show bombastica cun in lung barbagiat da custs starmentus per ils pajataglias ed ina massa indrizs che daventan ruinas? L’Italia ha vulì impedir quai cun far gieus decentrals en plirs lieus – insatge che la Svizra vul forsa era far il 2038. Perquai èn ils gieus olimpics 2026 a Livigno, Milaun, Cortina ed auters lieus er in test per la Svizra. Ma funcziuna quai propi – senza ruinas e custs stravagads? Era quai fatschenta Claudio Spescha sin ses viadi a Livigno.

27 min

In stgazi emblidà: Il relasch da l’Engadin Press returna a chasa

In stgazi emblidà: Il relasch da l’Engadin Press returna a chasa

Dapi l’onn 1960 è ina gronda collecziun da fotografias veglias dal Grischun stada emblidada en il tschaler dal Museum da la communicaziun a Berna. Ussa turna quest stgazi puspè a chasa en la Fundaziun grischuna per la fotografia a Cuira: 50 000 fotografias istoricas da l’anteriura stamparia a Samedan Engadin Press. I sa tracta cunzunt da fotografias da l’Engiadina enturn il 1900. Ellas dattan novs sguards en il passà: sguards davos las culissas dal turissem glamurus da quella giada.

28 min

Operaziun ospital: L’Engiadin’Ota en la breduglia

Operaziun ospital: L’Engiadin’Ota en la breduglia

Dapi il cumenzament da l’onn stattan l’Ospital Engiadin’Ota e dus centers d’attempads qua senza daners da la vischnanca. Il concurs smanatscha. Quest film dals «Cuntrasts» accumpogna persunas pertutgadas e responsablas durant las emnas decisivas avant la votaziun. Entant ch’i regia grond travasch sin la staziun d’urgenza, resta al team enturn la presidenta da fundaziun, Selina Nicolay, be anc curt temp per persvader la populaziun da ses plan da salvament. Il temp è stgars e quai chaschuna critica. «D’ina politica da tema» discurra l’anteriur cusseglier naziunal da la partida Il Center, Duri Campell. Per intginas pazientas e pazients sco era per il persunal è questa intschertezza turmentanta. Tge ch’ina serrada da l’ospital muntass per el? «La mort», di il pazient da dialisa Marco Dosch. Daspera era l’optimissem grond avant paucs onns: 35 milliuns francs èn vegnids investids en l’ospital. Hai dà en il passà decisiun sbagliadas? Na, di l’anteriur president da fundaziun Christian Brantschen e s’exprima per in’elavuraziun.

27 min

Brinzauls: Bandunar e spazzar – u turnar e restar

Brinzauls: Bandunar e spazzar – u turnar e restar

62 emnas è Brinzauls stà bandunà ed evacuà. Entant che la vita dastga puspè turnar en il vitg, resta l’avegnir da Brinzauls intschert. Durant l’evacuaziun han blers decidì da bandunar Brinzauls per adina. La via per questa dischlocaziun facultativa è dentant lunga. Ed a la fin perdan tuttas e tuts insatge. Tgi che va e tgi che resta. Il purs Annette e Georgin Bonifazi vulan viver vinavant a Brinzauls. Ma lur famiglia vegn a stuair far il pur en in vitg per part destruì. Las chasas da la glieud che vul dischlocar ston numnadamain vegnir spazzadas. Gery Liesch na vul betg pli turnar a Brinzauls, perquai che sia chasa è be pli «ina ruina». Maria Müller ha il giavisch da puspè inscuntrar ils vischins da Brinzauls in pèr kilometers pli lunsch en la «zona da dischlocaziun» a Vazarouls. Ed era Ernst Liesch vul ir, ma n’è betg d’accord cun l’indemnisaziun per sia chasa per pudair dischlocar.

26 min

Responsabladad al limit – in onn cun Daniel Albertin

Responsabladad al limit – in onn cun Daniel Albertin

«Igl è stà in onn fitg pretensius», di Daniel Albertin, il president communal d’Albula/Alvra. Pretensius, perquai ch’igl ha dà enorm bleras sfidas dapi la davosa evacuaziun da Brinzauls il november 2024. Saja quai perquai ch’ina part da las abitantas e dals abitants vul turnar a chasa, quai che las autoritads na lubeschan betg, u saja quai perquai ch’ins crai adina puspè che la costa vegnia oragiu, ma sa quietescha lura puspè. Durant il davos onn avain nus pudì accumpagnar Daniel Albertin cun la camera. In vair carussel d’emoziuns. A muments da plaschair suondan muments da nunchapientscha. I passa betg in di che Daniel Albertin na sto betg sa fatschentar cun Brinzauls. Sper tut questas sfidas cun Brinzauls è el era pur cun corp ed olma. Ina chargia dubla che fa adina puspè ponderar, sch’el duess chalar sco president communal. Il film «Responsabladad al limit – in onn cun Daniel Albertin» dat in’invista davos las culissas. El mussa muments da Daniel Albertin sco president communal e muments da sia vita privata, nua ch’el sa revegn.

28 min

Senza flad – Corina Schmed va als cunfins

Senza flad – Corina Schmed va als cunfins

Corina Schmed ha ina finamira ambiziusa: Ella vul esser l’emprima dunna svizra che sa noda cun be ina fladada e duas nudaglias passa 159 meters sut l’aua. In’idea ch’è naschida spontanamain, be paucs mais suenter ch’ella ha per casualitad scuvert sia passiun per il sfunsar liber. Il film accumpogna Corina sin questa aventura, nua ch’ella vegn a ses cunfins corporals e mentals. Il sfunsar liber dovra in’enorma forza mentala, pertge ch’il corp signalisescha trasora ch’el veglia trair flad. Vegnir a frida cun quest reflex da surviver è perquai essenzial, avair dubis e far patratgs negativs percunter fatal. Per dumagnar il record sto Corina nudar sut l’aua passa duas minutas e mez senza trair flad. Sin quest viadi sa mussi però ch’i va per dapli che be per rumper il record. I va per curaschi, per la confidenza en sasezza, però era per realisar che la pli dira sfunsada è mintgatant quella en l’agen intern.

26 min

Musica da pitschen ensi – la proxima generaziun Scherrer

Musica da pitschen ensi – la proxima generaziun Scherrer

Per l'emprima giada hai dà in project sur tuttas generaziuns – in inscunter da la famiglia Scherrer nua che tuts e tuttas fan quai ch'els ed ellas fan il pli gugent – musica! Mammas, ondas, il bab e cusrinas s'inscuntran per trais dis en la chasa Scherrer a Trun. Ordlonder resulta in concert communabel e nus avain astgà accumpagnar las emprovas a chasa. Maria, Clara Maria, Giulietta, Anna Catrina, Eva Luisa e Marc Aurel – els èn la generaziun giuvna – e la musica als accumpogna di per di. «Suenter avair fatg musica sa sentan ins simplamain bain, sco sch'ins avess gudagnà insatge» – di Maria Bognar, la figlia da Letizia Scherrer. Il Cuntrasts dat invistas en la vita da la famiglia che sa maschaida cun la vita musicala.

26 min

Far endretg a tuts – la planisaziun dal territori

Far endretg a tuts – la planisaziun dal territori

Actualmain èn bleras vischnancas en il Grischun vi da reveder lur planisaziun locala. Quai ha da far cun la lescha federala che pretenda da construir a moda pli concentrada. La finamira: betg duvrar memia bler terren. Per ils «Cuntrasts» avain nus accumpagnà la vischnanca da Mustér tras quest process intensiv ed emoziunal. Tuttina sco bleras autras vischnancas en il Grischun ha era Mustér bler memia bler terren da bajegiar. Tut en tut correspundan quellas reservas a 15 plazzas da ballape. Sulom per sulom vegn sut la lupa e passa set hectaras ston vegnir reducidas cun midar zonas u cun prender il terren or da la zona da construcziun. Quai tutga ils possessurs da terren. Els perdan d’in mument a l’auter blers daners. Ils «Cuntrasts» accumpognan inscunters cun possessurs da terren e las persunas responsablas per la revisiun e mussan lur via tras questa procedura intensiva e cumplexa.

27 min

Al set da «L’ultim Rumantsch»

Al set da «L’ultim Rumantsch»

Tge dovri enfin ch’in film guarda propi ora sco in film? Co lavuran acturas, acturs e l’entira crew da film ensemen per dar vita ad in’istorgia audiovisuala? Tge lavur sa zuppa davos ils purtrets filmics perfetgs da la segunda stafla da «L’ultim Rumantsch»? L’autur da films Casper Nicca ha pudì accumpagnar las lavurs al set da film da la seria rumantscha e dar in sguard davos las culissas: per exempel sin il reschissur che lavura intensivamain cun las acturas ed ils acturs. U sin las duas sulettas persunas rumantschas da la crew che mussan che lur lavur – en la mascra u sco segund assistent da camera – è tuttina impurtanta sco quella d’in actur principal. A Casper Nicca reussescha uschia in sguard intim en quest mund serrà, concentrà e passiunà da quellas e quels che fan films.

26 min

L’ultima gasetta - quo vadis schurnalissem regiunal?

L’ultima gasetta - quo vadis schurnalissem regiunal?

Adina damain persunas abuneschan gasettas regiunalas. I dat pli e pli paucs inserats. Quai senta era la «Südostschweiz», la gasetta da mintgadi grischuna. Il dumber d’abunaments è sa reducì l’ultim decenni per in terz. Ussa vul l’interpresa da famiglia avair success cun in duo schurnalistic da la Germania: Joachim Braun e Nikola Nording. Els sa concentreschan sin las medias digitalas e vulan cuntegns che interessan uschè bleras lecturas e lecturs sco pussaivel. La nova lingia procura per malcuntentientscha en politica e cultura. Er expertas ed experts da medias crititgeschan quest svilup. En discussiun èn las medias sco quarta pussanza e sco pitga da la democrazia. Il film accumpogna la redacziun en transfurmaziun e mussa co che l’interpresa da famiglia funcziuna. Ensemen cun ses dus frars vul la vicepresidenta Susanne Lebrument manar vinavant l’ierta da ses bab Hanspeter Lebrument. Ella sa mova en il champ da tensiuns tranter pretensiun schurnalistica e rentabilitad.

50 min

Il stgazi da Samedan – istorgia en aur, tul e launa

Il stgazi da Samedan – istorgia en aur, tul e launa

Da vestgids fins en saida rosa e mongias en oss da balenas sur barettas en tul fin a tschops da parada en aur e launa u bicorns a la Napoleun – en Chesa Planta a Samedan, sin palantschin, datti tut quai ed anc bler dapli. In stgazi da textilias en radund 500 tocs or da trais tschientaners. Quest onn ha la Chesa Planta finalmain pudì instradar in’inventarisaziun scientifica – e las istoricras da textilias, Thessy Schoenholzer Nichols e Briony Langmead, sco er il designer e costumist Bernhard Duss sa mussan intgantads da la valur unica da la collecziun da Samedan. Spezial è ch’ins sa che tut quella rauba tutgava a las duas famiglias noblas de Salis e de Planta. Uschia survegn la collecziun conturas e sias parts pon vegnir cumbinadas cun persunalitads realas. Per la manadra da la Chesa Planta, Martina Shuler-Fluor, n'è quai betg mo in'attracziun per la publicitad, mabain er ina resursa impurtanta per la perscrutaziun da la cultura materiala e da la moda istorica en l’Engiadina. Proxima stad vul ella gia preschentar intginas textilias al public – e tgi che na vul betg spetgar fin lura survegn gia uss in’invista exclusiva en ils «Cuntrast».

26 min

Tumasch e Benedetg Dolf – In omagi da Gieri Venzin

Tumasch e Benedetg Dolf – In omagi da Gieri Venzin

Tumasch Dolf è probabel il cumponist rumantsch il pli popular. El ha creà veritabels hits che vegnan chantads en l’entira Rumantschia, gugent e savens. Ses figl Benedetg è main enconuschent – sia ovra dentant anc ditg betg scuverta. En in omagi preschenta Gieri Venzin ils dus cumponists da la Val Schons e lur grondiusas chanzuns.

27 min

Nino Schurter – sia ultima cursa – film extendì

Nino Schurter – sia ultima cursa – film extendì

Nino Schurter ha anc ina giada grondas finamiras en sia ultima stagiun da la cuppa mundiala da mountainbike. Cun prest 40 onns sa confrunta el danovamain cun il dir mintgadi da profi, mudregia ses corp – savend che blers adversaris èn fin dus decennis pli giuvens ch’el e che victorias daventan pli raras. Il film accumpogna la legenda da mountainbike dal cumenzament da la stagiun al Cape Epic en l’Africa dal Sid sur ils campiunadis mundials en il Vallais fin a sia ultima partenza a la cuppa mundiala a chasa a Lai. Schurter dat anc ina giada tut per realisar il siemi d’ina victoria en ses dachasa. Ins vesa Nino Schurter era sco persuna privata, co ch'el funcziuna sco uman e sco bab e co che ses ambient, ses geniturs, l’han marcà. Reusseschi a Nino Schurter da terminar sia carriera tenor giavisch – e co po el laschar liber questa vita da profi ch’el ha vivì var 25 onns?

52 min

Ina prisa punk – en vista a las crisas da noss temp.!?

Ina prisa punk – en vista a las crisas da noss temp.!?

Betg mo ina presa, mabain in orcan da punk dovria noss temp, di la reschissura grischuna Magdalena Nadolska. A questa conclusiun vegn ella en vista ad ina societad che fa pauc, malgrà la crisa dal clima, malgrà la democrazia che va en muschna en l’America ed en blers pajais da l’Europa, malgrà populissem, femicidis e guerras. Tut quai furma la basa per il toc «Monokali Polypunk» ch’è da vesair actualmain en il teater da Cuira. Betg «peace and love», mabain punk saja la medischina necessaria per svegliar ina societad durmentada, di Magdalena Nadolska ed includa era sasezza. Malgrà tut las crisas actualas capitia pauc u nagut. Perquai punk. L’essenza dal punk saja la gritta e la gritta saja la forza che mettia l’uman en acziun. Uschia è naschì il project che ha manà al toc da teater «Monokali Polypunk».Il toc han scrit Flurina Badel e Gianna Olinda Cadonau. Era per ellas èsi cler: I na va betg per far reviver in’energia dals onns 1970, mabain per chattar il punk dad oz. Ma co tuna e co vesa or il punk da l’onn 2025? Il film dals Cuntrasts «Ina prisa punk» prenda si questa dumonda. El lascha vegnir a pled acturas ed acturs, la musicista, las auturas e la reschissura e mussa tge furma ch’il punk dad oz pudess avair.

25 min

Bondo – reconstruir e proteger

Bondo – reconstruir e proteger

Il film documentar «Bondo – reconstruir e proteger» documentescha las differentas lavurs da reconstrucziun suenter la bova catastrofala dal Piz Cengalo il 2017. Po l’uman sa proteger cunter las forzas da la natira? L’autura Susanna Fanzun e sia squadra han visità il grond plazzal da construcziun durant quatter onns, enfin la fin da las lavurs l’onn 2025. Ella ha discurrì cun las persunas responsablas da vart da la vischnanca, cun ils inschigners, cun abitantas ed abitants. Il film mussa co ch’ina cuntrada deserta vegn transfurmada en in territori ch’è pront per far frunt ad in proxim grond eveniment che na capita – uschia speran tuts – mai.

27 min

Bondo – reconstruir e proteger – cun suttitels rumantschs

Bondo – reconstruir e proteger – cun suttitels rumantschs

Il film documentar «Bondo – reconstruir e proteger» documentescha las differentas lavurs da reconstrucziun suenter la bova catastrofala dal Piz Cengalo il 2017. Po l’uman sa proteger cunter las forzas da la natira? L’autura Susanna Fanzun e sia squadra han visità il grond plazzal da construcziun durant quatter onns, enfin la fin da las lavurs l’onn 2025. Ella ha discurrì cun las persunas responsablas da vart da la vischnanca, cun ils inschigners, cun abitantas ed abitants. Il film mussa co ch’ina cuntrada deserta vegn transfurmada en in territori ch’è pront per far frunt ad in proxim grond eveniment che na capita – uschia speran tuts – mai.

27 min

Configuraziuns Agid Contact e proposta Podcast Servetschs Dretgs

SRG SSR

RTR Radiotelevisiun Svizra Rumantscha, succursala da la Societad svizra da radio e televisiun

SRF RSI RTS SWI Play Suisse